悼词/我也想结束得像只句号样简单
 作词 : 郑耀华
 作曲 : 郑耀华
姆妈，搭各位尊敬个长辈
各位邻居朋友，搭哥哥姐姐弟弟妹妹
谢谢大家今朝来送阿拉爸爸，来看伊最后一眼
假使伊自家肯定又要讲：“不好意思不好意思
呒没必要惊动介许多人来”
还会得讲：“烧烧脱，厾厾脱，河浜里向撒撒脱……
拨风吹吹脱末算唻”
简单简单简单简单，简单简单简简单单
爸爸二月一号走个，就前两天天突然老好嗰日
伊今年讲是八十七，但伊是孤儿，年轻辰光自家瞎写个嗰只生日
是阿拉叔公拿爸爸从潮州带到上海去当铺学生意
碰着个账房先生老好个，讲：“要想办法读书识字喔”，还经常督促伊
故咾后首来进了工厂人家老呆个伊会得写一手草体
上两个号头讲起，伊自家也讲自家不容易
我还记得伊用粉笔在石库门大门上写“随手关门”四个大字
三个字用繁体
简单简单简单简单，简单简单简简单单
亲眷邻居全晓得最好吃个是阿拉爸爸烧个小菜
我一直记得伊个手势，切菜、抓盐、拿揩布，在湿溚溚个公用灶披间
介穷个四十多年前头，我就是第一趟听阿拉爸爸讲到“色香味”咾啥几个字
有趟著伊一面在盛菜一面眼睛东寻西寻在寻啥物事
喔唷总算在龌蹉巴拉个地上拾着人家厾脱个青菜头头子
伊汏一汏，冲一冲，切成丝，撒在嗰只红烧素鸡上
讲：“看到伐，就要嗰恁介两三根丝，欸
就要意思意思”
简单简单简单简单，简单简单简简单单
小辰光记得屋里向样样物事好像全是阿拉爷娘自家做出来个
不但阿拉四百号里，连隔壁弄堂里全晓得，伊拉两家头手蛮强个
阿拉爸爸不晓得啥辰光学过眼木匠，胆子赫大，庎橱、大橱、五斗橱全自家做了
人家大橱脚做直个，伊非要像店里向做调羹形状弧形个
伊在后弄堂，赤著膊，走进走出邻居停下来
看伊拿块木头一眼一眼椠出线条
我最嚇伊有辰光会得呆牢，我想：
“伊覅做坏脱咾？”
简单简单简单简单简单，简简单单
伊常庄在讲：“好覅烦覅烦”
简单简单简单简单简单，简简单单
伊最嚇欠人家情，倒不怕自家出花样自家烦
简单简单简单简单简单，简简单单
房门一关，自家一摊

医生讲个：“老先生走了算蛮平静”
假使嗰恁介讲，故伊整个晚年也算一种平平淡淡清净
不过最近突然开始讲小辰光个河浜，日本人开枪，
报名迟到，否则差眼眼去朝鲜打仗
伊自家有套按摩操做了毛廿年咾，阿拉看伊面色看伊胃口好像蛮有效喔
故咾全呆脱了呀讲马上要开刀
进去手术间之前，伊头一直在摇，讲：“没想到……
没想到”
简单简单简单简单简单，简简单单
简单简单简单简单简单，简简单单
简单简单简单简单简单，简简单单
嗰两天在办事体阿拉姆妈也一直在讲：“简单简单”
安息伐，爸爸。我最好我个结束也像只句号介简单